“Дөрвөн есөд дөнөн үхрийн эвэр тас хөлдөнө” гэдэг хэдий ч өнгөрсөн долоо хоногт  цаг агаар уясч, хүйтний эрч эрс суларсан. Харин нутгийн ихэнх хэсгээр нөгөөдрөөс буюу энэ сарын 31-нээс хүйтний эрч чангарч, цасан шуурга шуурах төлөвтэй байгааг Ус, цаг уур орчны шинжилгээний газраас мэдээлж байна.

Мөн ирэх хоёрдугаар сарын нэгнээс зүүн зүгийн нутгийн зүүн хэсгээр, 02-нд баруун болон төвийн нутгийн хойд хэсгээр, 03-нд төв болон зүүн зүгийн нутгийн хойд хэсгээр бага зэргийн цас орж, явган шуурга шуурах юм байна. Хүйтний эрч чангарч Увс нуурын болон Дархадын хотгор, Идэр, Тэс, Буянт, Ерөө голын сав газраар шөнөдөө 35-40 градус, өдөртөө 23-28 градус, Хараа, Орхон-Сэлэнгэ, Туул, Тэрэлж, Хэрлэн, Онон Улз, Халх голын сав газраар шөнөдөө 28-33 градус, өдөртөө 18-23 градус, говийн бүс нутгийн өмнөд хэсгээр шөнөдөө 16-21 градус, өдөртөө 6-11 градус, бусад нутгаар шөнөдөө 24-29 градус, өдөртөө 13-18 градус хүйтрэх бололтой.