Удахгүй тайзнаа үндэсний урлагийн бахархал болсон шилдэг долоон хамтлаг нэгдэн, “Монгол төгсөшгүй” нэртэй тоглолт хийх гэж байна. Өнгөрсөн жил үндэсний урлагийн этно чиглэлээр уран бүтээлээ туурвидаг таван хамтлаг нэгдэн тоглолт хийж  байсан бол энэ удаа долоо болж өргөжсөн аж.   Тоглолт ирэх хоёрдугаар сарын 8, 9-нд болно.

Шинэ өнгө төрх, шинэ тайз засал, шинэ найруулгаар хийгдэх уг тоглолтыг сүүлийн үед уран бүтээлийн ааг омог нь савнаасаа аль хэдийнэ халиад буй Төрийн соёрхолт жүжигчин Д.Сосорбарам найруулж байгаа ажээ.

Уг тоглолтыг өнгөрсөн жил МУ-ын ерөнхийлөгч Ц.Элбэгдорж ивээлдээ авч зохион байгуулах бүхий л үйл ажиллагаанд дэмжлэг үзүүлж байсан бол энэ жил мөн л түүний ивээлд тус 7 хамтлаг багтсан гэнэ. Гадаад орнуудын айлчлалд нүүр бардам эх орныхоо нэр төрийг сурталчилдаг эдгээр уран бүтээлч залуусыг Ерөнхийлөгч хаа ч явсан дагуулж явдаг уламжлал тогтсон гэж хэлж болно. Тэд бүгд залуу уран бүтээлчид байдаг бөгөөд хамтлагт “Хөсөгтөн”, “Алтан Ураг”, “Домог”, “Жонон”, “Бөртэ”, “Тэнгэр Аялгуу” зэрэг хамтлагийн авъяаслаг залуус байдаг юм. Сонирхуулахад, тиоглолтын цар хүрээг Монголын ард түмэнд улам их түгээн дэлгэрүүлэх зорилгоор энэ жилийн тоглолтыг НЗДТГ мөн дэмжиж ажиллахаар болсон байна.

Тоглолтын дэлгэрэнгүйг 99005652, 99102207 утаснаас лавлаж болно.