Монгол Улсын хэмжээнд утасгүй суурин холбооны үйлчилгээнд ашиглаж буй радио давтамжийн зурвасыг чөлөөлөхөөр болсон тухай Харилцаа холбооны зохицуулах хорооноос 47 дугаар тогтоолыг өнгөрсөн онд гаргасан бөгөөд гүйцэтгэх бэлтгэл ажил эхэллээ. Учир нь цаашдаа дэвшилтэт техник, технологийг нэвтрүүлэхэд уг шугам чөлөөтэй байх ёстой ажээ. Тиймээс хоёрдугаар сарын 1-нээс 50хххххх дугаарлалт бүхий утасгүй суурин холбооны үйлчилгээг зогсоож, хэрэглэгчдийн эрх ашгийг бодолцон үзэж,  “F-zone”-ын хэрэглэгчдийг “Скайтел”-ийн сүлжээнд шилжүүлэхээр болсон байна. Өөрөөр хэлбэл, “F-zone” ын хэрэглэгчид 50хххххх дугаар болон ашиглаж байсан гар утастайгаа үүрэн телефоны “Скайтел” компанийн хэрэглэгч болох юм.

Сануулахад,” F zone”-сүлжээнд хэрэглэж байсан зарим утас “Скайтел”-ийн сүлжээнд тохирохгүй байгаа учраас шинэ сүлжээнд нэгдэхийн тулд өөрийн дугаар, гар утсаа авч Скайтел компанийн үйлчилгээний салбарууд дээр очоод үзүүлэх хэрэгтэй юм байна. Ингээд шинэ сүлжээнд ашиглах боломжтой бол хуучин дугаартайгаа шууд үйлчилгээний эрхээ сэргээлгэнэ. Сүлжээнд тохирохгүй гар утас байвал хэрэглэгчийн хуучин гар утсыг Скайтелийн утсаар үнэгүй сольж өгөх ажээ. Мөн бидний хэлж заншсанаар “цагаан утас” ашигладаг байсан хэрэглэгчид утасныхаа төхөөрөмжийг шинэчлүүлэх боломжтой гэнэ.  Ийнхүү 50хххххх дугаарын бүх хэрэглэгчид ойрын “Скайтел” компанийн үйлчилгээний салбарт очиж, дугаараа цаашид хэрхэн ашиглах тухай зөвлөмжийг авах боломжтой юм.