Улсын дуурь, бүжгийн эрдмийн театрт өнөөдөр 17.00 цагт Оросын суут хөгжмийн зохиолч П.И.Чайковскийн “Франческа Да Римини” балет, З.Хангалын “Эрдэнэсийн охид” балетыг тоглох юм. Нэг бүлэгт “Франческа Да Римини” балетын цомнолыг А.Дантегийн зохиолоос сэдэвлэн бичсэн байна. Харин “Эрдэнэсийн охид” балет нь нэг бүлэгтэй бөгөөд цомнолыг Хөдөлмөрийн баатар, Төрийн шагналт, Ардын жүжигчин Б.Жамъяндагва бичжээ.

Эрдэнийн чулуу бүхнийг төлөөлсөн Эрдэнэсийн охид элдэв хэлбэрээр хөшөөлөн зогсох нь амьд байгаль энэхүү үнэт чулуулагт шингэн уусна. Эрдэнэсийн охидын бүжиглэн наадах нь энэхүү байгалийн баялаг амилан биелээд, байгаль гайхамшгаа гайхуулах мэт сэтгэгдэл төрүүлэх уг балетыг өнөөдөр тайзнаа бүжнэ.

Харин маргааш ДБЭТ-ын тайзнаа Италийн суут хөгжмийн зохиолч Ж.Пуччинийн “Тоска” дуурь эгшиглэнэ. Уг дуурьт өнгөрсөн зургадугаар сард Монголын үзэгчидтэй анх удаа уран бүтээлээрээ уулзсан Армяны шилдэг тенор Ованес Айвазян дахин тоглож байгаа юм.