Ногоон тивийн нийг­мийн халамж багас­­санаас болж өрх толгойлсон
эмэг­тэйчүүд биеэ үнэлэх, стрип­тиз үзүүлэхээс өөр аргагүй болжээ. Тэд
толгой хоргодох байрныхаа хөлсийг төлөх, хүүхдүүдээ тэжээхийн тулд ийм
ажил хийх нь ихэссэн байна.

Тус улсад он гарснаас хойш бэлбэсэн эцэг, эхийн тэтгэмжийг бууруулсан
юм. Төсвөөсөө 728 сая австрали доллар хэмнэх зорилгоор гаргасан уг
журмаас болж ганц бие эцэг эхчүүд сар бү­рийн тэтгэмжээсээ 60-100 доллар
алдахад хүрчээ. Тиймээс өдгөө тус улсад өрх толгойлсон эмэг­­тэйчүүд
ядуур­лын ирмэгт ирээд байна. 728 сая австрали доллар нь манай­хаар
нэг их наяд гаруй төгрөг юм.

Брисбен хотын биеэ үнэлэх газрын ажилтан бүс­гүйн ярьс­наар өрх
тол­гойлсон эмэг­­тэйчүүдэд олгодог нийг­­­мийн халамжийг буу­руулс­наас
хойш ажил хайж ирсэн бүсгүйчүүд эрс нэ­мэгдсэн гэнэ. Тэрбээр ийм 20
бүсгүйтэй учирсан аж. Нэрээ нууцлахыг хүссэн ажилтан эмэгтэй “Тэд Зул
сарын баяраар хүүхдүүддээ авсан бэлэгнийхээ өрийг төлөх, тэднийгээ
цаашид сур­гах зорилгоор нэмэлт ажил сураглаж ирдэг” гэжээ. Түүнчлэн тус
биеэ үнэлэх газарт эмэгтэйчүүд найман цагаар ээлжилж ажилладаг бөгөөд
3-5 үйлчлүүлэгч авч, сард мянгаад австрали дол­лар олдог гэнэ.

Харин Мельбурнийн нэ­гэн цэнгээний газрын ажилт­ны өгүүлснээр
нийг­мийн ха­ламжийг бууруулсны да­­раа­хан өрх толгойлсон эмэг­­тэйчүүд
тайчих урлаг үзүүл­дэг клубт ажил хайж ирдэг болсон байна. Тэрбээр
“Магадгүй тэд секс бизнесээс илүү тайчих урлагийг мөнгө олох хамгийн
боломжтой арга гэж үздэг байх” хэ­мээ­жээ. Хөөрхий эхчүүд байр,
хоолныхоо мөнгийг олохын тулд ийм алхам хийхэд хүрчээ.

Өрх толгойлсон эцэг, эх­чүүдийн холбооны төлөөлөгч Катрина Рэй “Ганц бие
эхчүүд гэр бүлээ тэжээхийн төлөө хүнд ажил хийж байна. Нийгмийн
халамжийг багасгасны улмаас ингэхээс ч өөр аргагүй болжээ” гэв. Тэрбээр
дөрвөн хүүхэдтэй бөгөөд хагас сард 287 авст­рали доллар чадан ядан
хүргэдэг байна. Энэ талаараа “Заримдаа өглөөний цайгүй, өдрийн хоолгүй
өнжих үе цөөнгүй. Хүүхдүүддээ оройн хоол хийж өгч чадахгүй бол талх шарж
өгдөг. Ядуу зүдүү амьдралдаа гутран хааяа дэрээ нортол уйлдаг” гэжээ.

Түүний үзэж буйгаар Австралийн Засгийн газар юу хийснээ сайн мэдэхгүй.
Өрх толгойлсон эмэгтэйчүүд гэр бүлээ тэжээж, байр сууц­ны хөлсөө яаж
төлд­гийг ойлгодоггүй аж. Кат­рина Рэйгийн хувьд гэр бү­лийн
хүчирхийллээс болж нөхрөөсөө салжээ. Тэр­­бээр даатгалын салбарт
ажил­ладаг бөгөөд долоо хо­ногт 22 цаг ажил эрхэлж, цагт 25 австрали
доллар авдаг. Энэ цалин нь юунд ч хүрэлцдэггүй учраас Катрина Рэй
“Манайх гараж, машинд амьдрахаас өөр аргагүй болж байна. Би одоо
гэртээ диван дээр унтдаг. Харин дөрвөн хүүхэд минь нэг орон дээр арай
ядан багтаж хонодог” хэмээжээ.