Ашигт малтмалын тухай хуулийн шинэчилсэн найруулгын анхны хэлэлцүүлэг өнгөрсөн оны төгсгөлд болж, түүнээс хойш гурван ч удаагийн хэлэлцүүлэг болсон билээ. Гэвч “Энэхүү хуулийн хэлэлцүүлгийн гадна нэгэн чухал асуудал хоцорч буйг анхаараач” хэмээн бичил уурхай эрхлэгчид онцолж байна.Тэд  уг хуулийн төслийг боловсруулахаас өмнөх санал асуулгад багтаж “амжаагүй” гэдгийг анхааруулж,  нэр томъёоны тодорхойлолтын эрхзүйн зохицуулалт хийх хэрэгтэй гэдгээ хэвлэл мэдээллээр дамжуулан дуулгахыг хүсчээ. “ Нинжа” гэх гаж хэллэгээс эхлээд ялгаж  салган ойлгуулах зүйл олон бий гэнэ, тэдэнд. Байгаль орчин, хөдөлмөрийн аюулгүй байдлыг сайжруулах, эрхзүйн зохицуулалт хийх  зэргээр шинэ хуулинд нэмэлт өөрчлөлт хийх санал цөөнгүй гэдгээ мөн илэрхийлсэн юм. 

Эн түрүүнд  “ Бичил уурхай гэж Газрын тухай хуулийн 16.1.11-д заасан зориулалтаар орон нутгийн тусгай хэрэгцээнд авсан талбайд болон энэ хуулийн 44-р зүйлийн 1-д заасан үүсмэл орд, үйлдвэрлэлийн хаягдлыг олборлох зорилгоор иргэний хуулийн 36-1-д заасан холбоо мөн хуулийн 36-ийн 4-ийн хоёр дахь хэсэгт заасан хоршооны хэлбэрээр зохион байгуулагдсан хуулийн этгээдийн олборлох, боловсруулах үйл ажиллагааг хэлнэ” хэмээн тодотгох хэрэгтэй гэдгийг дуулгаж байна.

Одоогоор тэд албан ёсоор бичил уурхайчдын холбоо байгуулаагүй хэдий ч Монгол Улсын Иргэний хуульд заасан холбоо, хоршооны хэлбэрээр зохион байгуулагдан үйл ажиллагаа явуулж ирсэн гэж үзэж буй юм. Анх 2010 онд Ашигт малтмалын хуулинд  бичил уурхайг нэр томъёоны хувьд тодорхойлж өгснөөр үйл ажиллагааны чиглэлийн дагуу 60 гаруй мянган хүнийг ажлын байраар хангаж, шууд бусаар 300 орчим хүний амь амжиргааг залгуулсан гэж үздэг аж. Тиймээс  энэ хуулийн шинэчилсэн найруулгад өөрсдийн санал, нэмэлт өөрчлөлтийг хийснээр цаашид байгаль орчин, иргэдийн амьдрах орчинд нөлөөлөх сөрөг нөлөөллийг хууль эрхзүйн хүрээнд зохицуулах боломж бүрдэнэ хэмээж буй. Албан бус мэдээгээр, өдгөө 5000 гаруй хүн бичил уурхай эрхэлдэг юм байна.