Гавьяат жүжигчин, ДБЭТ-ын гоцлол дуучин Э.Амартүвшин дэлхийн алдарт тенор Франсиско Винасын нэрэмжит олон улсын дуурийн дуулаачдын уралдаанд оролцохоор энэ сарын дундуур Испани улсыг зорьсон билээ. Тус тэмцээнд мэдүүлгээ явуулсан олон улсын 500 гаруй дуурийн дуулаачаас хагас шигшээд оролцох эрхийг 80 уран бүтээлчид /эрэгтэй, эмэгтэй нийт/ олгож, тэд Испанид ирж өрсөлдсөн юм. Үүнээс сүүлийн шатанд шилдэг 17 дуучин тунаж үлдсэн бөгөөд өчигдөр “Gran Teatre del Liceu” театрт шилдгүүдийг зарлахад, Монгол Улсын Гавьяат жүжигчин, дуучин Э.Амартүвшин II байр эзэлж, мөнгөн мадалийн эзэн болжээ.