Талбайн теннисний оны анхны “Их дуулга” болох “Австралийн нээлттэй тэмцээн” Мельбурн хотноо зургаа дахь өдрөө үргэлжлэн явагдаж байна. Тус тэмцээний ганцаарчилсан төрлийн дөрөвдүгээр тойргийн теннисчид эхнээсээ тодроод байна.
 
Гуравдугаар тойрогт оноолт таарсан ОХУ-ын Мария Шарапова (2), АНУ-ын нэрт теннисчин Винус Уильямс (25) нарын тоглолтод 6:1, 6:3-аар Маша илүүрхжээ. Шарапова өнгөрсөн жилийн тус тэмцээний шигшээд шалгарч Азаренкад ялагдсан ч "Францын нээлттэй тэмцээн"-д түрүүлж, Лондонгийн наадмаас мөнгөн медаль хүртэж, улмаар оны төгсгөлд дэлхийн чансааны хоёрт хүрэх эрэмбээ хадгалж үлдсэн. Энэ оныг форм сайтай эхлүүлж буй Маша тус тэмцээний эхний хоёр тойргийг хуурай хожилтоор (нутаг нэгт тамирчин Ольга Пучковаг 6:0, 6:0, Японы Мисаки Доиг мөн л 6:0,
6:0-оор) хийж өмнөх 28 жилийн өмнөх нэгэн амжилтыг давтсан. Маша Винустэй хийсэн тоглолтод эхний үед нэг, дараагийн үед гурван сэтийг алдсан ч ялалтыг өөрийн болгож хоорондох тоглолтын хожлын харьцаагаа 5:5 болголоо.

 “Их дуулга”-ын долоон түрүүт Винус Уильямс ганцаарчилсан төрлөө дуусгаж буй ч хосын төрөлд дүү Серенагийн хамт оролцож байна.

Дөрөвдүгээр тойрогт дэлхийн манлай теннисчин, тус тэмцээний өнгөрсөн жилийн аварга Беларусын Виктория Азаренка ОХУ-ын Елина Весина, АНУ-ын Серена Уильямс (3) ОХУ-ын Мария Кирилленко (14), Хятадын Ли На (6), Германы Жулия Гёргес (18) нарын шилдэгүүд оноолт таарсан байна. Мөн энэ жил амжилттай тоглож, зодог тайлахаа дуулгаж буй ОХУ-ын Светлана Кузнецова дөрөвдүгээр тойрогт шалгараад байна.

Эрэгтэйчүүдийн хувьд дөрөвдүгээр тойрогт тэргүүн теннисчин Сербийн Новак Жокович, Швейцарийн Станислас Вавринка (15), Испаний Дэвид Феррер Японы Кей Нишикорин нарын шилдэгүүд оноолт таарчээ.

Хатуу хучилттай талбайд болж буй тус тэмцээний шагналын сан 30 сая австрали долларт багтаж буй бөгөөд ганцаарчилсан төрлийн аваргууд тус бүр хоёр сая 430 мянган, хосын аваргууд 475 мянга, холимог хосын аваргууд 135 мянган ам.долларын шагнал хүртэх билээ.

Тэмцээн ирэх долоо хоногийн ням гаригт буюу 01.27-нд өндөрлөнө.