Монголын үндэсний сагсан бөмбөгийн холбооны “Үндэсний супер лиг”-ийн тэмцээн нэгдүгээр сарын 21-нд Спортын төв ордонд нээлтээ хийнэ. 17 дахь жилдээ уламжлал болон зохион байгуулагдаж буй энэхүү тэмцээнд төлөвлөгөө хуваарийн дагуу явагдах болсныг Монголын үндэсний сагсан бөмбөгийн холбооны ерөнхий нарийн бичиг С.Тулга тэргүүтэй тэмцээнийг зохион байгуулагчид сэтгүүлчдэд албан ёсоор мэдэгдлээ. Энэ удаагийн тэмцээн шагналын сан 200 сая төгрөг бөгөөд түрүүлсэн баг аваргын цом, алтан бөгж 40 сая төгрөг, дэд байр 20 сая төгрөг, хүрэл медалийн эзэд 10 сая төгрөг авна. Мөн тэмцээнд оролож буй багууд хожил бүрдээ нэг сая төгрөг, хожигдвол 450 мянган төгрөгийн шагнал хүртэх аж. Энэхүү тэмцээнд  “Баянзүрх Буллз”, “Танан гарьд”, “Энержи Ресурс Харцага”, “TLG-13”, “Эрдэнэдрийлинг Ригс”, “QGX Акулууд”, “Эхлэл клуб” зэрэг долоон баг өрсөлдөнө.

Монголын үндэсний сагсан бөмбөгийн холбоо байгуулагдсан цагаасаа эхлэн Монголын сагсан бөмбөгийн хөгжлийг шинэ шатанд гаргахын төлөө ажилладаг. Үүний эхний ажил нь “Үндэсний супер лиг”-ийг гадны томоохон лигүүдтэй адил дүрэм журмаар зохион байгуулж, ирээдүйд NBA, Евролигийн хэмжээнд хүргэхээр зорьсны хамгийн эхний ажил шагналын сан, шударга шүүлт, техникийн дэвшил байх гэнэ. Мөн тэмцээний тасалбараас олсон орлогын 40 хувийг багуудад хуваарилахаар шийдвэрлэсэн нь шинэлэг зүйл болжээ. Ийнхүү багуудыг санхүүгийн хувьд дэмжсэнээр тамирчид мэргэжлийн болж, сагсан бөмбөгийн хөгжил түргэсдэг гадны жишгийг ч дагасан аж. Мөн тэмцээий үеэр тамирчдын статистик үзүүлэлтийг нарийвчлан гаргах гэнэ. Ингэснээр тухайн тамирчны статистик түүх бүтээж, шилдгүүдийг шалгаруулна. “Үндэсний супер лиг”-ийн бэлэгдлийн шигшээ баг, шилдэг шинэ залуу, шилдэг зургаа дахь, улирлын үнэ цэнэтэй, шигшээ болон хагас шигшээгийн үнэ цэнэтэй тоглогчийг шалгаруулна. Шилдгээр шалгарсан тоглогчид NBA-ийн тоглолт үзэх эрхээр шагнуулах аж.