Лэброн Жэймс лигийн түүхэнд хамгийн залуугаараа шилдэг шинэ тоглогч, трибл дабл, 1 мянга, 10 мянган, үнэ цэнэтэй тоглогч, бүх оддын тоглолтын үнэ цэнэтэй тоглогч гэх мэтчилэн амжилтуудыг тогтоосон.

Лигийн дүрэм өөрчлөгдөж шууд ахлах сургуулиас НБА-д элсэх боломжгүй болсноор Лэброний эдгээр амжилтуудыг хойшид хэн ч хүрч эвдэхэд хэцүү болж байгаа. Харин Лэброн дараа дараагийн амжилтуудыг гаргасаар.

Тэрээр маргааш буюу Пүрэв гаригт Голдэн Стэйт Уарриорс багийн эсрэг 18 оноог авахад л 20 мянган онооны босгыг давсан 38 дахь тоглогч болно. Түүгээр зогсохгүй хамгийн залуугаараа гэсэн тод амжилтын эзэн болох болно.

Жэймс сүүлд оролцсон 75 тоглолтынхоо 74-т нь 18 болон түүнээс дээш оноог авч байснаас нь харахад дээд амжилт эвдэгдэх тоглолт маргааш болох нь гарцаагүй байна.

Ингэснээр тэрээр 28 нас 17 өдөртэйдөө 20 мянгат болж хамгийн залуугаар гэсэн амжилтыг Коби Брайнтаас өвлөж авна. Брайнт 29 нас 122 өдөртэйдөө өмнөх рекордыг эзэмшиж байжээ.

Энэ талаар Майами Хит багийн тоглогчид сонирхолтой зүйлсийг ярижээ.

“Тэр хувиа бодогч биш. Бид түүнд илүү олон оноо авах боломжийг гаргаж өгдөг. Гэвч тэр үүнийг хийдэггүй. Лэброн шидэх талаар бодож байх үед нь багийн тоглогч нь суларчихвал, тэр дамжуулалт өгдөг” Двэйн Уэйд.

“Лэброн 40 шидэлт хийх үү гэж үү. Март, хэзээ ч ийм зүйл болохгүй” Жэймс Жонс.