Ирээдүйн шинэ үеийн БМВ Х5 загварын ямар ч халхавчгүй зураг ил боллоо. Өмнө хэд хэдэн удаа папараци нар халхавчтай зургийг нь нийтэлж байсан бол энэ удаад халхавчгүйгээр олны өмнө гарч ирлээ. Герман авто үйлдвэрлэгчийн хүн бүрийн сайн мэдэх энэхүү загварын тоглоомон, багасгасан хувилбарыг энэ жилийн сүүлээр худалдаалж эхлэх бөгөөд доорх зураг бол тоглоомон автомашины зураг юм. Түүний олноор үйлдвэрлэгдэх хувилбарыг ч мөн адил 2013 оны сүүлээр зах зээлд гаргах төлөвлөгөөтэй байгаа ажээ.

Шинэ үеийн БМВ Х5 загварыг F15 код нэрээр нэршилсэн бөгөөд хамгийн сүүлийн үеийн xDrive бүх дугуйн хөтлөгч системийг шинэ хөдөлгүүрийн сонголтын хамтаар танилцуулах юм. F30 буюу 3 цувралд ашигласан 2.0 литрийн турбочаржед дизель хөдөлгүүрийн сонголт түүнд байгаа бөгөөд мөн хос турботой V8 бензин хөдөлгүүр ч байгаа аж. 2014 БМВ Х5 загварыг "X for All" хэмээх платформ дээр хөгжүүлсэн тул 150 кг хөнгөн болж байгаа юм байна. Зургийг сайн ажваас 2014 БМВ Х5 загварт 3 цувралын урд хэсэг, 4 цувралын агаар орох нүхтэй урд бампер, Х3-аас ирэх хойд хэсэг зэрэг зүйлс ажиглагдлаа. Салоны хувьд 3-р эгнээний суудал сонголтоор ирэх төлөвтэй байгаа юм.