Өмнөд Солонгосын “Samsung” корпорацид амжилт далласан Galaxy S цувралын хамгийн сүүлийн бөгөөд шилдэг загвар Galaxy SIII смартфоны борлуулалт долоон сарын хугацаанд 40 саяас давжээ. Харьцуулахад, өмнөх загвар болох Galaxy SII нь 20 сарын хугацаанд 40 сая хувь зарагдаж байжээ. Харин анхны хувилбар болох Galaxy S дэлхийн зах зээлд нийт 24 сая хувь борлогдсон юм. “Samsung”-ийн мэдээлснээр дэлхийн хэмжээнд өдөрт 190 мянган ширхэг Galaxy S цувралын смартфон худалдаалагддаг байна.
 
Galaxy S худалдаанд гарсан цагаас хойш хоёр жил гаруй хугацаанд цувралын нийт борлуулалт 100 сая давсан тухай “Samsung’” мэдээлж байна. Galaxy S анх 2010 оны тавдугаар сард худалдаанд гарснаар “Samsung” энэ төрлийн зах зээлд АНУ-ын “Apple” корпораци өрсөлдөхүйц хэмжээнд хүрсэн юм. Гэхдээ борлуулалтын хэмжээгээр “Samsung” илүү байгаа ч “Apple”-ын iPhone цувралууд илүү нэр хүндтэй.
“Samsung” 2013 онд зах зээлд бараг хагас тэрбум ухаалаг төхөөрөмж нийлүүлэхээр төлөвлөсний 75 хувь нь смартфон байх гэнэ.