Америкийн ачаа тээврийн “Chinook BH-234” нисдэг тэрэг Перугийн Пукальпа мужийн ойролцоох ширэнгээс хөөрсөн даруйдаа унаж, осолджээ. Ослоор багийн хоёр нисгэгчээс гадна Америкийн иргэн таван хүн амь үрэгдсэн байна. Уг нисдэг тэрэг нь АНУ-ын Орегон мужийн Портлэнд хотод төвтэй “Columbia Helicopters” компанийн эзэмшилд байсан бөгөөд Перугийн хойд хэсэгт газрын тосны хайгуул хийх, өрөмдлөгийн ажилд дэмжлэг үзүүлэх багийнхныг тээвэрлэхээр хөөрсөн боловч ийнхүү осолджээ.

Гэрчүүдийн яриагаар нисдэг тэрэг хөөрөөд таван минут болсныхоо дараа жолоодлого алдан агаарт эргэлдэж, хар утаа баагиулсаар унаж, осолджээ. Перугийн Пукальпа мужийн цагдаагийн дарга Мигель Кардосогийн мэдээлснээр осолдсон нисдэг тэрэг дотроос гурван хохирогчийн цогцсыг олсны дараа нисдэг тэрэг осолдохоос өмнө онгоцноос үсэрсэн өөр гурван хүний цогцосыг ойр орчмоос нь олж, илрүүлжээ. Перугийн албаны хүмүүс ослын шалтгааныг тодруулахаар ажиллаж буй бөгөөд урьдчилсан байдлаар даац хэтэрсэн гэх дүгнэлт хийжээ.