Энэ долоо хоногийн хувьд хамгийн анхаарал татсан асуудал нь нийтийн тээврийн болоод буруу талдаа жолооны хүрдтэй автомашиныг амралтын өдөр зорчуулах эсэх тухай байсан нь “1111” төвд ирсэн санал, хүсэлтээс харагджээ. Өнгөрч буй долоо хоногт нийт 1942 санал, хүсэлт, талархал, гомдол, шүүмжлэл ирснээс хамгийн олон давтамжтай нь дээрх хоёр асуудал байсныг Засгийн газрын хэвлэлийн алба өөрийн сайтдаа мэдээлсэн байна. Буруу талдаа хүрдтэй автомашиныг зарим өдөр хөдөлгөөнд оролцуулахгүй гэсэн саналыг шүүмжилж, автобусны билетийн үнэ 600 төгрөг болох талаар хөндсөнд бухимдаж, нийтийн тээврийн “Сутайн буянт” компани Найрамдал-Саппорогийн чиглэлийн үйлчилгээнд тасалбарынхаа үнийг 900 төгрөг болгосныг эсэргүүцэж байгаагаа иргэд илэрхийлжээ.

Зарим сургуулийн оюутнуудын виза картыг Монголын оюутны холбоо одоо хүртэл гаргаж өгөөгүй, Монголын цахилгаан холбоо компани интернэтийн төлбөрөө буурууллаа хэмээн сурталчилсан ч бодитоор хэрэгжүүлээгүй, хурд нь ч хэвээрээ байгаа, Сэлэнгэ аймгийн Мандал сумын Хэрх тосгонд 20 гаруй хүүхэд шар өвчнөөр өвчилсөн зэрэг мэдээллийг иргэд хэлжээ. Мөн иргэдэд төрийн анхан шатны үйлчилгээ хүргэдэг хорооны нийгмийн ажилтан, өрхийн эмнэлгийн эмч сувилагч, замын цагдаа зэрэг албан хаагчдын мэдлэг боловсрол, ажлын хариуцлага, ёс суртахуунд анхаарах шаардлагатайг олон иргэн сануулсан байна.
 Насанд хүрч, асрамжийн газраас гарсан өнчин хүүхдүүдэд улсаас үзүүлдэг тусламжийн талаар лавласан нь энэ долоо хоногийн хамгийн шинэлэг асуулт байсныг Засгийн газрын хэвлэлийн албаныхан онцолжээ. 18 нас хүрээгүй байхдаа бүтэн өнчин болсон 18-24 насны иргэнд гэр авахад нь дэмжлэг үзүүлэхээр жилд нэг удаа 1,2 сая төгрөгийн мөнгөн тэтгэмж олгодог ч эдгээр хүүхдүүд амьдралд хөл алдах нь цөөнгүйг мөн сануулсан байна.