Жүжигчин Чарли Шин өгөөмөр загнаж, буян үйлдсээр. Тэрээр хамгийн сүүлд хорт хавдартай бяцхан охинд 75 мянган ам.доллар хандивлаж байсан бол энэ удаад золгүй папараццичны оршуулгын ажилд зориулан 12 мянган ам.доллар ханливласан байна. Чарли Шин дуучин Жастин Биберийн автомашины зургийг авах гэж улайрснаас автомашинд мөргүүлэн амиа алдсан зурагчин Крис Гуеррагийн үхэлд харамсч буйгаа илэрхийлэн, 12 мянган ам.доллар хандивласан аж.

Папарацци зурагчин Крис Гуерра гэгч 29 настай залуу поп од Жастин Биберийн цагаан “Ferrari”-г шинэ жилийн баярын өдөр цагдаа зогсоосон байх зуур зургийг авах гэж улайрч байгаад араас нь ирсэн машинд мөргүүлэн нас барсан юм. Үүний дараа Жастин Бибер папараццичны үхэлд гүнээ харамсч буйгаа илэрхийлсэн бөгөөд папараццичны эцэг, эх хүүгийнхээ үхэлд Жастин Биберийг буруутгахгүй хэмээн мэдэгджээ.

Чарли Шин үүнээс өмнө цэргүүдэд хандив өргөж, жүжигчин Линдсей Лоханы 100 мянган ам.долларын өрийг дарж байсан юм.