Сүүлийн үед жүжигчний мэргэжилдээ илүү анхаарал хандуулах болсон дуучин Жастин Тимберлейк хөгжмийн ертөнцдөө эргэн ирсэн тухайгаа зарлажээ. Хөгжмийн ертөнцөөс бүтэн зургаан жил холдон, Холливудад  хүчээ сорьж, жүжиглэх авъяасаа гайхуулсан тэрээр өнгөрсөн хугацаанд дуу, хөгжмөө маш их санасан гэнэ.  Жастин Тимберлейк дуу бичлэгийн студидээ эргэн ирснээ өнөөдөр цахим ертөнцөөр дамжуулан олонд зарласан бөгөөд хэзээ, ямар шинэ уран бүтээл гаргах талаар дэлгэрэнгүй мэдээллийг гурван хоногийн дараа өгөх гэнэ. 

Харин Холливудад хүчин зүтгэсэн зургаан жилийн хугацаандаа Жастин Тимберлейк  “Friends with Benefits”, “Bad Teacher”, “In Time” “Trouble with the Curve” зэрэг кинонд  гол болон туслах дүр бүтээгээд байгаа.

Жастин Тимберлейк анх Диснейн сувгийн “Оддын эрэлд” уралдаант нэвтрүүлгээр олонд танигджээ. Үүний дараа нь тэрээр  “Микки Маусын шинэ үеийн бүлгэм” телевизийн олон ангит кинонд тоглож, хожим  “"N Sync” нэртэй хөвгүүдийн хамтлаг байгуулсан нь багагүй нэрд гарч байсан юм. Жастин Тимберлейк өнгөрсөн аравдугаар сард жүжигчин Жессика Билтэй гэрлэсэн билээ.