Барак Обама шинэ засгаа бүрдүүлж байна. Тэрээр Батлан хамгаалахын сайд, Тагнуудын төв газрын даргыг зарласан, харин одоо ойрын хугацаанд Сангийн шинэ сайдыг нэрлэнэ гэсэн хүлээлт байна.

Энэ үеэр мөн Хөдөлмөрийн сайд Хильда Солис огцорч буй тухай АНУ-ын Ерөнхийлөгчийн мэдэгдэлд дурджээ. “Төрийн алба хаших хугацаанд Хильда Солис өөрийгөө ажил хөдөлмөр тууштай эрхлэгч гэдгээ харуулж чадсан. Солис сайд сүүлийн дөрвөн жилийн хугацаанд АНУ-ын эдийн засгийг дунд ангийн эрх ашгийн үүднээс хамгаалж чадсан хүний нэг” хэмээн Обама түүнийг үнэлсэн байна. Тэрбээр Солисийн хийж бүтээсэн ажилд талархал илэрхийлээд, цаашдын ажил, амьдралд нь амжилт хүсэв.