Сүүлийн үед Америкийн хэвлэлүүдээр нэрт дуучин Элтон Жон болон Девид Фуниш нарыг дахин хүүтэй болох гэж байгаа тухай мэдээлэх болжээ. Америкийн “New York Post” өдөр тутмын сонины өчигдрийн дугаарт Элтон Жон, Дэвид Фуниш нар Захари хүүг нь  өнгөрсөн 2010 оны Зул сарын баяраар төрүүлж өгсөн Калифорнид амьдардаг тээгч эхээс дахин хүүхэдтэй болохоор хүлээж байгаа гэж бичжээ. Харин энэхүү мэдээлэл нийтлэгдсэн даруй дуучин Элтон Жонын төлөөлөгч дээрх нийтлэлийг ор үндэсгүй худал цуурхал гэдгийг албан ёсоор мэдэгджээ. Гэхдээ үүнээс өмнө өнгөрсөн арваннэгдүгээр сард мөн Элтон Жоныг ахин хүүтэй болох гэж буй тухай мэдээлэл Америкийн сайтуудаар цацагдаж байсан аж.

Дуучин Элтон Жон, Дэвид Фуниш нар 12 жил хамтран амьдарсны эцэст 2005 онд албан ёсоор гэрлэлтээ батлуулсан юм. Харин өнгөрсөн 2010 оны зул сарын баяраар тээгч эх Захари хүүг нь төрүүлсэн юм.