Төрийн соёрхолт, жүжигчин Д.Сосорбарамын “Од” театрын тайзнаа энэ сарын 16-нд Айн Рэндийн “Нэгдүгээр сарын 16-ны шөнө” жүжиг амилах гэж байна. Тус жүжгийн зохиолыг сэтгүүлч, орчуулагч Б.Цацрал орчуулан Төрийн соёрхолт, жүжигчин Д.Сосорбарам найруулжээ. Жүжигт “Х-Түц” хамтлагийнхан, тодруулбал, Гавьяат жүжигчин Л.Баттулга, И.Одончимэг, Н.Онон, Т.Бархүү, С.Тэмүүжин, Г.Нарансолонго болон “To be or not to be” шоуны шилдэг таван оролцогч залуус оролцон тоглож буй. Д.Сосорбарам соёрхолт болон “Х-Түц”-ийнхэн өмнө нь Айн Рэндийн “Сайтар эргэцүүл” жүжгийг тайзнаа тавьсан “эртний” хамтрагчид. Тиймээс ч дахин хамтран ажиллахаар шийдэж, мөн л Айн Рэндийн зохиолыг сонгон авчээ.

Өвөрмөц шийдэл бүхий “Нэгдүгээр сарын 16-ны шөнө” жүжгийг ердөө ганцхан удаа буюу энэ сарын 16-ны үдэш тоглох ба NTV телевизээр 19.00 цагт шууд дамжуулах гэнэ. Жүжгийг “амьдаар” мэдрэхийг хүсвэл “Од” театрын хаалга нээлттэй. Тасалбарын үнэ 101 мянган төгрөг юм байна.