Драмын урлагийн шилдгүүдийг шалгаруулдаг “Гэгээн муза” наадмын гран при шагналын эзэн, зургаан “муза”-гаар шагналын хур буулгасан “Тэнгэрийн хүү” бүтээлээр хүүхэлдэйн кино хийхээр болжээ. УДЭТ, БСШУЯ-тай хамтран зохион байгуулсан түүхэн жүжгийн шилдэг бүтээлийн уралдаанд зохиолч, сэтгүүлч Б.Цогнэмэхийн “Тэнгэрийн хүү” бүтээл шалгарч тайзнаа амилсан юм. Хүннү гүрний 2222 жилийн ойд зориулан туурвисан уг бүтээл тайзнаа тавигдсан цагаасаа үзэгчдийг байлдан дагуулж, 2011 оны тайзнаа мэндэлсэн хамгийн шилдэг бүтээлд олгосон гран-при шагналын эзэн болсон юм. Тиймээс уг бүтээлээр хүүхэлдэйн кино хийхээр хэсэг залуус ханцуй шамлан ажилдаа ороод байгаа гэнэ.