УИХ-ын Төрийн байгуулалтын байнгын хорооны хуралдааныг өнөөдөр 10.00 цагт зарлажээ. Уг хуралдаанаар Төрийн албаны зөвлөлийн даргыг томилох тухай асуудлыг хэлэлцэх юм. Монгол Улсын Ерөнхийлөгчөөс Төрийн албаны зөвлөлийн даргад Б.Цогоог нэр дэвшүүлээд байгаа. Өнгөрсөн долоо хоногт тус байнгын хорооны хуралдаанаар Б.Цогоог Төрийн албаны зөвлөлийн даргаар томилох асуудлыг хэлэлцсэн боловч УИХ-ын гишүүн О.Баасанхүү нэр дэвшигчийг төрийн албанд ажилласан эсэхийг нь тодруулах шаардлага байна гэж үзсэнээр эл асуудлыг хойшлуулсан юм. Тэгвэл одоо дахин хэлэлцэх гэж байна.

Мөн энэ өдөр УИХ-ын Аюулгүй байдал, гадаад бодлогын байнгын хорооны хуралдааныг 13.30 цагт зарлажээ. Түүгээр Тэсэрч дэлбэрэх бодис, тэсэлгээний хэрэгслийн эргэлтэд хяналт тавих тухай хуулийн шинэчилсэн найруулгын анхны хэлэлцүүлэг,  Төрийн нууцын жагсаалт батлах тухай хуульд өөрчлөлт оруулах тухай хуулийн төсөл хэлэлцэх эсэх,  Монгол Улсын Үндэсний аюулгүй байдлын зөвлөлийн тухай хуульд нэмэлт оруулах тухай хуулийн төсөл хэлэлцэх эсэх, Хилийн боомтын тухай хуулийн төсөл, Засгийн газрын тухай хуульд нэмэлт оруулах тухай, Газрын тухай хуульд нэмэлт оруулах тухай, Монгол Улсын хилийн тухай хуульд нэмэлт оруулах тухай, Амьтан, ургамал, тэдгээрийн гаралтай түүхий эд, бүтээгдэхүүнийг улсын хилээр нэвтрүүлэх үеийн хорио цээрийн хяналт, шалгалтын тухай хуульд өөрчлөлт оруулах тухай, Гадаадын иргэний эрх зүйн байдлын тухай хуульд өөрчлөлт оруулах тухай, Хүн худалдаалахтай тэмцэх тухай хуульд өөрчлөлт оруулах тухай хуулийн төслүүдийн хэлэлцэх эсэхийг тус бүр шийдвэрлэх юм.