“Монголын балетын хөгжил сан”… АНУ-ын “Бостон балет” компанийн гоцлол бүжигчин, Гавьяат жүжигчин Д.Алтанхуягийн санаачлан байгуулсан энэхүү сан нь 2013 оны  “Сонгодог бүжгийг олон нийтэд сурталчлан таниулах” жил болгоод байгаа билээ. Энэ хүрээнд балетчин Д.Алтанхуяг зочдоо Монголд уриад байгаа аж. Түүний зочин өнөөдөр Монголд ирэх бол Гавьяат жүжигчин Д.Алтанхуяг хоёр хоногийн өмнө Улаанбаатарт буусан байна.

Д.Алтанхуягийн Монголын үзэгчдэд барьж буй бэлэг нь “Winter star 2013” тоглолт буюу алдарт П.И.Чайковскийн “Хунт нуур” балет. Монгол Улсын Ерөнхийлөгчийн ивээл дор, Соёл, Спорт, Аялал жуулчлалын яамны дэмжлэгтэйгээр энэ сарын 11, 12-ны өдөр тоглох “Хунт нуур” балетын гол дүрд  АНУ-ын “Бостон балет” компанийн гоцлол бүжигчин Ашли Эллис, Аветик Карапетиан нар болон Гавьяат жүжигчин Д.Алтанхуяг гоцлох юм. Харин өнөөдөр Монголд “Хунт нуур” балетын хар, цагаан хунд гоцлох Ашли Эллис ирэх юм байна.