“Анод банкны удирдлагуудын” гэх тодотголтой болоод буй 15 хүнд холбогдох хэргийг шүүх хурал маргааш Баянзүрх дүүргийн шүүхэд болно. Тодорхой шалтгааны улмаас удаа дараа хойшлогдож байсан дээрх хэргийг дэнслэх анхан шатны хурал хамгийн сүүлд өнгөрсөн арванхоёрдугаар сарын 18-нд болсон ч гэрч хүрэлцэн ирээгүй гэсэн шалтгаанаар хойшлогдсон юм. Шүүгдэгчдийн өмгөөлөгчдийн зүгээс Анод банкны ерөнхий нягтлан бодогчоор ажиллаж байсан Г.Энхцэцэг гэгчийг гэрчээр дуудах хүсэлтээ шүүх бүрэлдэхүүнд гаргаад байсан.

Хуурамч хувьцаа гарган 1200 гаруй хувьцаа эзэмшигчийг хохироосон хэрэгт буруутгагдан шүүгдэж байгаа Анод банкны удирдлагуудын хэргийг хоёр жил дамнуулан УМБГ, Нийслэлийн прокурорын газарт шалгаж буй. Хэрэгт холбогдсон 15 хүнийг Эрүүгийн хуулийн тусгай ангийн 150.3  буюу банкны эд хөрөнгийг завшсан, 156.3 буюу банкны хууль тогтоомжийг зөрчсөн  гэх үндэслэлээр буруутгаж байгаа юм.

149 хавтаст хэрэг бүхий хэргийг шүүх хурлыг Б.Баатар шүүгч даргалж, хуралд улсын яллагчаар О.Мөнхбаатар, С.Хишигжаргал, Х.Нямтайван, шүүгдэгчээр Монголбанкны тэргүүн дэд ерөнхийлөгч асан Б.Энххуяг, Хяналт шалгалтын газрын захирал асан Ж.Ганбаатар, “Анод” банкны ТУЗ-ийн гишүүн Л.Уламбаяр, Н.Даваа, Э.Гүр-Аранз, Д.Энхтөр нарын 15 хүн оролцох юм.