Ерөнхий сайд Н.Алтанхуяг өчигдөр Хөдөлмөрийн яамны харьяа Хөдөлмөрийн төв биржид ажиллалаа. Хөдөлмөрийн төв биржийн гол зорилго иргэдийг ажилд зуучлахад оршиж байна. Монгол иргэдээ ажилтай, орлоготой байлгах зорилготой Хөдөлмөрийн яамны хувьд ирэх жилүүдэд өрнөх бүтээн байгуулалтын томоохон ажлуудын эрэлт хэрэгцээг тооцож мэргэжилтэй ажилтан бэлтгэхэд анхаарч буй аж. Энэ онд эхний ээлжинд “Оюутолгой” төслийн хүрээнд 6600 мэргэжилтэй ажилтан бэлтгэнэ. Суралцагчид нь уул уурхай, авто зам, барилга зэрэг үйлдвэрийн салбарт ажиллахад бэлтгэгдэнэ. Суралцах хугацаандаа нэг суралцагч сарын 190400 төгрөгийг цалин хэлбэрээр авна. Тодруулж хэлбэл, 140400 төгрөг нь хөдөлмөрийн хөлсний доод хэмжээгээр тооцон олгож байгаа цалин бол 50 мянган төгрөг нь унаа, хоолны мөнгө болж суралцагчид очих аж. Мөн Мэргэжлийн сургалт үйлдвэрлэлийн сургуульд суралцах иргэний хувьд 24-өөс дээш насных байна. Энэ нь хөдөлмөрийн зах зээл дээр энэ насныхан хамгийн эрэлттэй байдагтай холбоотой аж. Учир нь энэ насныхан ажилд хамгийн хариуцлагатай ханддагийн зэрэгцээ 40-өөс дээш насныханд ажлын байр ховор олддог.  Тэгвэл хамгийн хариуцлагатай, юуг ч хийж чадах боломжтой эдгээр хүмүүсээ мэргэжилтэй болгож, ар гэрээ авч явах боломжтой болгоход зорилгыг давхар агуулжээ.

Дээрх арга хэмжээний үеэр Үйлдвэрлэл урлалын сургуулийн захирал “Амьдрал дээр байгаа ажлын байрны эрэлтийн судалгааг үнэн зөв гаргах хэрэгтэй байна” гэлээ. Учир нь өнгөрсөн хугацаанд Мэргэжлийн сургалт үйлдвэрлэлийн сургуульд олон иргэн нарийн боовчин, талхчин, тогооч, үсчин, гоо сайханч зэрэг мэргэжлээр түгээмэл төгссөн байдаг.  Амьдрал дээр тэдгээр төгсөгчдөөс хэд нь ажлын байраар хангагдсан, ажил хөдөлмөр эрхлээд явж байгаа нь тодорхойгүй байдаг. Гэтэл ажил олгогч нарын зүгээс өрлөгчин, арматур зангидагч, шаварчин, уул уурхайн салбарт бол том ачааны машин жолоодох жолооч гээд илүү хүнд үйлдвэрийн салбарт ажиллах мэргэжилтэй ажилтан хайгаад байдаг. Тиймээс судалгаагаа нарийвчлах шаардлага байна” гэсэн юм.

Хөдөлмөрийн яамны сайд энэ асуудалд хариулт өгөхдөө “Ажил олгогч нарт ямар чиглэлийн мэргэжилтэн хамгийн их эрэлттэй байгааг нарийвчилж авна. Түүний үндсэн дээр мэргэжилтэй ажилтнуудыг бэлтгэнэ. Мэргэжилтэй ажилтан бэлтгэхэд компаниуд өөрсдөө бас гол үүрэг рольтой ажиллана. Тодруулж хэлбэл, компаниуд нь сургалтын байгууллагатай хамтран ажиллах хүчнээ сургаж, үйлдвэрлэлийн дадлагыг өөрийн үйлдвэр, аж ахуйн нэгж дээр хийлгэх, төгсөлтийн шалгалтыг хамтран авч, төгсөгчийг ажлын байраар хангах зэрэгт хамтран ажиллах боломжийг бүрдүүлж байгаагаараа өнгөрсөн жилүүдийнхээс онцлогтой болохыг тэмдэглэсэн юм.

Тиймээс энэ чиглэлээр мэргэжилтэй ажилтан бэлтгэхэд зориулж “Оюутолгой” компанийн зүгээс 40 тэрбум төгрөг зарцуулахаар болжээ.

Оюутолгой, Тавантолгой зэрэг томоохон орд газруудыг тойроод ажлын байр нэмэгдэх болсон. Тиймээс ирэх жилүүдэд уул уурхайн чиглэлээр ажиллах мэргэжилтэй ажилтан хамгийн их хэрэгцээтэй болж байгаа. Мөн энэ онд бүтээн байгуулалтын нөр их ажлууд хийгдэнэ, зургаан аймгийг Улаанбаатар хоттой авто замтай холбохын зэрэгцээ орон сууцжуулах хөтөлбөр хэрэгжинэ. Түүнийгээ дагаад сайн арматур зангидагч, сайн өрлөгчин, сайн авто зам барих мэргэжилтэн чухал. Тиймээс та ажил хайж байгаа бол Хөдөлмөрийн төв биржид хандан бүртгүүлж, “цалинтай” суралцан мэргэжилтэй болж, ажилтай болох боломж байгааг дуулгая. Хөдөлмөрийн төв биржтэй мөн  77111331, 77001331 дугаарын утсаар холбогдож болох юм байна.