Зүүн Африкт орших Этиоп улсын Тагнуулын албаныхан алан хядах Аль-Кайда бүлэглэлтэй холбоотой 15 сэжигтнийг баривчилсан талаар мэдээлжээ. Тус улсын Тагнуулын Ерөнхий газрын албаныхны эх сурвалжуудад мэдээлснээр баривчлагдсан сэжигтнүүдээс галт зэвсэг болон гэмт бүлэглэлтэй холбоотой заавар зөвлөмж авч байсныг гэрчлэх хэд хэдэн баримт, видео илэрсэн байна.

Сэжигтнүүдийг өнгөрөгч лхагва гаригийн орой баривчилсан бөгөөд тэднийг Этиопын хөрш Сомали болон Кенид идэвхитэй үйл ажиллагаа явуулдаг Аль-Кайдагийн салбар Аль-шабабтай холбоотой байж болзошгүй хэмээн албаныхан үзэж байгаа гэнэ. Түүнчлэн гэмт этгээдүүдээс галт зэвсэг илэрсэн нь тэд Этиопт ямар нэг халдлага үйлдэхээр төлөвлөсөн байж болзошгүй бөгөөд хэргийн мөрдөн шалгах ажиллагаа үргэлжилж байна хэмээн албаныхан мэдэгджээ.