Дэлхий дахинд хит дуу, өвөрмөц хэв маягаараа алдаршсан Германы  “Tokio Hotel” рок хамтлагийн дуучин Билл болон гитарчин Том Каулитц нар телевизийн “DSDS” шоунд нэгджээ. Авъяслаг ихрүүд болох Том, Билл нар Германы телевизийн “DSDS”  буюу “Deutschland sucht den Superstar” гэх авъяастан шалгаруулах шоуны энэ оны шинэ цувралд шүүгчээр ажиллаж байгаа гэнэ. “DSDS” шоуны 10 дахь цуврал өнөөдрөөс буюу 5-ны өдрөөс “RTL” телевизээр цацагдах бөгөөд Билл, Том нар шүтэн бишрэгчидтэйгээ анх удаагаа шоуны шүүгчийн хувиар уулзах аж.

“Tokio Hotel” хамтлаг 2001 онд дуучин Билл Каулитц, гитарчин Том Каулитц, бөмбөрчин Густав Шефер, аргил гитарчин Георг Листинг нарын бүрэлдэхүүнтэй ‘Devilish’ нэрээр байгуулагдсан. “Tokio Hotel” хамтлаг нь дэлхий дахинаа хэдэн сая хувь цомог борлуулж, “MTV Video Music Awards”, “MTV Latin America Awards”, “MTV Europe Music Awards” зэрэг дуу, хөгжмийн томоохон наадмуудаас олон тооны шагнал хүртсэн Германы хамгийн алдартай хамтлаг юм. Тус хамтлаг өнгөрсөн хугацаанд “Schrei” (2005), “Zimmer 483” (2007), “Scream” (2007), “Humanoid” (2009) гэх цомог гаргаад байгаа бөгөөд өдгөө “Heaven” нэртэй шинэ цомгийн дуу бичлэгийн ажилдаа орсон тухай албан ёсны вебсайтаараа дамжуулан мэдэгджээ.  Мөн хамтлагийн ахлагч, дуучин Билл Каулитц өнгөрсөн онд “Far East Movement” хамтлагтай хамтран "If I Die Tomorrow" нэртэй дуу гаргасан нь нэлээд хит болжээ. Билл болон Том Каулитц нар 1989 оны есдүгээр сарын 1-нд Германы Лайпциг хотод төрсөн бөгөөд Билл ах Томоосоо арван минутын дараа мэндэлсэн аж.