Ноосон бүтээгдэхүүн  үйлдвэрлэгчдийн холбооноос  санаачлан өвөлжилт хүндэрсэн хөдөө орон нутгийн малчдад  ноос боловсруулах үйлдвэрүүдээс тусламж үзүүлэхээр боллоо. Ингэхдээ ноос боловсруулах үйлдвэрүүд  хандив цуглуулсны дүнд нийтдээ 60 сая төгрөгийн  малын тэжээл болон бусад зүйлийг малчдад өгөх юм байна. Өвөлжилт хүндэрсэн үед ноосны үйлдвэрүүд нийгмийн хариуцлагаа эрхэмлэж ийнхүү тусламж үзүүлж буй тухай албаныхан онцолж байна.

2011 оноос эхлэн УИХ-ын “Үндэсний үйлдвэрлэлийг дэмжих зарим арга хэмжээний тухай” 30 дугаар тогтоолын дагуу  үндэсний үйлдвэрт тушаасан хонины болон тэмээний ноосны кг тутамд 2000 төгрөгийн урамшуулал олгож  байгаа бөгөөд энэ ажлын үр дүнд үндэсний үйлдвэрүүд 2012 онд гэхэд 16200 тонн ноос худалдан авсан нь нийт улсын хэмжээнд бэлтгэж буй ноосны 90 гаруй хувийг эзэлж байна. Одоогийн байдлаар  ноос гүн боловсруулах 10–аад үйлдвэр эсгий эдлэлийн 100 гаруй жижиг, дунд үйлдвэр үйл ажиллагаа явуулж байгаа аж.