Иракийн нийслэл Багдад хотод өнгөрөгч пүрэв гаригт амиа золиослогч бөмбөг дэлбэлсний улмаас 27 хүн амиа алдаж 60 хүн шархджээ. Цагдаа нарын мэдээлснээр халдлага Багдад хотын хамгийн хөл хөдөлгөөн ихтэй автобусны буудалд гарсан байна. Амиа золиослогч унаж явсан машиндаа бөмбөг дэлбэлсэн бөгөөд буудлын ойролцоох зогсоолд байсан олон машин уг дэлбэрэлтэд өртөн шатжээ.

Одоогоор хэргийг мөрдөн шалгаж байгаа бөгөөд сүүлийн үед Иракт гэнэтийн халдлага дэлбэрэлтүүд удаа дараалан гарч байгааг албаныхан энэ үеэр онцолсон байна. Хамгийн сүүлд тус улсад өнгөрөгч даваа гаригт гарсан халдлагын улмаас 23 хүн амиа алдаж 87 хүн шархдсан юм. Олон улсын зарим эх сурвалжууд Аль-Кайда гэмт бүлэглэлийг дээрх халдалгуудад холбоотой хэмээн  мэдээлж байгаа ч Иракийн холбогдох албаныхан гэмт халдлагатай холбоотой тодорхой мэдээллийг одоогоор хараахан мэдээлээгүй байна.