Арилжааны банкуудын зээлийн нөхцөл байдал ямар байна вэ? Тухайлбал, хугацаа хэтэрсэн зээл ямар байгаа талаар Монгол банкны албан мэдээлэлд тулгуурлан шинжиж үзье. Монголбанкны мэдээллээр бол өнгөрөгч 2012 оны арваннэгдүгээр сарын байдлаар хугацаа хэтэрсэн зээл нийт зээлийн 2.2 хувийг эзэлсэн байна. Харин аравдугаар сард 1,9 хувь, есдүгээр сард хугацаа хэтэрсэн зээл нийт зээлийн 1,7 хувь, наймдугаар сард 1,5 хувь, долдугаар сард 1,3 хувийг эзэлж байсан байна. Энэ мэтчилэн хугацаа хэтэрсэн зээлийн хэмжээ сараас сард бага багаар өссөн байна.

Хугацаа хэтэрсэн зээлийн өрийн үлдэгдэл үндсэндээ чанаргүй зээл болдог. Зээлийн эргэн төлөх хугацаандаа амжиж төлж чадалгүй үлдэгдэл үүсгэх нь цаашлаад эдийн засгийг гацаанд оруулах сөрөг нөлөө үүсгэх магадлалтай ажээ.

Статистик мэдээллээр бол сүүлийн жилүүдэд манай улсад хугацаа хэтэрсэн болон чанаргүй зээлийн хэмжээ эрс буурч буй. 2010 онд дунджаар чанаргүй зээл нийт зээлийн өрийн үлдэгдлийн 17 хувийг эзэлж байсан. Харин энэ онд дунджаар 4 хувьтай байна.

Эдийн засгийн өсөлттэй жилүүдэд компаниудад мөнгө, санхүүжилтийн хэрэгцээ маш их байдаг хэрээр арилжааны банкууд их зээл гаргадаг. Арилжааны банкуудын 2012 онд гаргасан зээлийн хэмжээ өмнөх оноосоо бараг 50 хувиар өссөн гэх мэдээлэл гарч байна. Өнгөрсөн жил болон энэ жил гаргасан зээлийн хэдэн хувь нь хугацаа хэтэрсэн болон чанаргүй зээл болохыг удахгүй мэдэгдэх болно.