Францын нийслэл Парис хотноо олон мянган хүмүүс төв талбайдаа цуглан шинэ оноо угтахаар бужигнаж байх үеэр зэвсэглэсэн дээрэмчид тус хот дахь “Apple” компанийн нэрийн дэлгүүрийг тоносон байна. Баг зүүж, зэвсэглэсэн дөрвөн этгээд “Apple”-ын дэлгүүрээс нийт нэг сая еврогоор үнэлэгдэх бараа бүтээгдэхүүн авч зугтжээ. Парисын цагдаа нарын мэдээлснээр дээрэмчид оройн 20.00 цагийн үед  Дуурийн театрын ард орших  “Apple”-ын дэлгүүр рүү нэвтэрсэн байна. Дараа нь этгээдүүд дэлгүүрийг тонож дуусаад бүхээгт тэргэнд суун зугтжээ.  Цагдаа нар энэхүү хэрэгт сэжиглэн хоёр хүнийг баривчлан байцааж  байгаа аж.

Сүүлийн үед “Apple”-ын нэрийн дэлгүүрүүд халдлагад өртөх нь ихэссэн бөгөөд өнгөрсөн 2012 онд зөвхөн АНУ-ын Нью-Йорк хотод л гэхэд нийт 3890 “Apple”-ийн бүтээгдэхүүн дэлгүүрийн лангуунаас хулгайд алдагджээ.