Баянхонгор аймагт сувилагч эмэгтэй нярайг угаах гэж байгаад халуун усанд түлсэн хэрэг оны өмнөхөн буюу арванхоёрдугаар сарын 29-нд гарсан талаар бид мэдээлсэн билээ. Нярайг өнөөдөр өглөө ГССҮТ-ийн Түлэнхийн тасгаас Эх хүүхдийн эрүүл мэндийн үндэсний төвийн Нярайн сэхээний тасагт шилжүүлээд байгаа юм. Хүүхдийн биеийн байдлын талаар түүний аав н.Ёндонгоос тодруулахад, “Одоогоор ээж нь сахиж байгаа. Хурдан эдгэнэ гэдэгт найдаж байна. Ажлын хариуцлага алдсан сувилагчид эрүү үүсгэн, шалгаж эхэлсэн гэсэн” гэлээ.

Нярайг нийслэлд авчирч, ГССҮТ-д хүргэхэд гуравдугаар зэргийн түлэгдэлттэй ирсэн бөгөөд ЭХЭМҮТ-д шилжүүлснээр ГССҮТ-ийн Түлэнхийн төвийн эмч нар байнгын хяналт тавьж, боолтыг нь хийж байхаар болсон байна.