Оскарын шагналт дууны найруулагч Майкл Хопкинс Шинэ Зеландын Вайохине голоор гатлага онгоцтойгоо аялж яваад осолджээ. Энэ үеэр Майкл Хопкинстой цуг аялж явсан хоёр хүн амь гарч чадсан ч Холливудын нэрт дууны найруулагч харамсалтай нь амиа алдсан байна. Шинэ Зеландын цагдаагийн газрын мэдээлснээр Майкл Хопкинс нь аврах хантааз, хамгаалалтын малгай өмссөн байсан ч голын хүчтэй урсгалд цохигдон нас баржээ. Тэрээр ийнхүү 53 насандаа хорвоогийн мөнх бусыг үзүүлэв.

Майкл Хопкинс нь “Бөгжний эзэн” цуврал киноны “Хоёр цамхаг” гэх хоёр дахь анги болон “Кинг Конг” киноны дууны найруулгаараа Оскарын шагнал хүртэж байжээ. Мөн тэрээр “Гүйгч Блэйд”, “Супермэн”,  “Трансформерс”, “Кунгфу панда” “Мөрөөдлийн охид”  зэрэг олон шилдэг киноны дууны найруулга дээр ажиллаж байсан Холливудын хүндтэй эрхмүүдийн нэг юм.