2013 онд Хятадын нүүрсний импорт дахин өснө гэж www.theaustralian.com сайтад бичсэн байна. Нүүрсний импорт өсвөл үүнээс ашиг хүртэх гол улс нь Австрали байх болно гэжээ. Хятадын “Нүүрс тээвэрлэгч компаниудын холбоо”-ноос нүүрсний импорт ирэх жил гарцаагүй энэ жилийнхээс давна гэж үзсэн байна. Хятад 2012 онд 270 сая тонн нүүрс импортоор авсан бөгөөд үүний ихэнхийг Австрали, Индонезоос нийлүүлжээ.

2012 онд 270 сая тонн нүүрс импортолсон нь 2011 оны хэмжээнээс 45 хувиар өссөн тоо ба 2013 онд ч гэсэн энэ үзүүлэлт өснө гэж үзэж байна. Манай улсын хувьд энэ жил Хятадад 21 сая тонн гаруй нүүрс нийлүүлжээ. Хятад дэлхийн хамгийн том импортлогч орон ч гэсэн дотооддоо 3,7 тэрбум нүүрс олборлож, хэрэглэдэг юм. 

Нүүрсний импорт өсч байгаа нь үнэ хямдарч, тээврийн өртөг буурсантай холбоотой гэж Синьхуа агентлаг онцолсон байна. Түүнчлэн “Энэ жил нүүрсний импорт маш тогтворгүй байсан. Үнийн хэлбэлзэл ихтэй бас нүүрс нийлүүлэгчид нүүрсээ худалдаалах сонирхол их байснаас илүүдэл нийлүүлэлт үүсгэж байсан” гэж холбооны шинжээч Хан Лей хэлсэн байна. Гэхдээ импортлогчдоос болж Хятадын дотоодын нүүрс олборлогч компаниуд ч гэсэн үнээ буулгах, орлого алдах, зарим нь алдагдалд ороход хүргэсэн байна.

Дашрамд дурьдахад, ирэх нэгдүгээр сарын дундуур Бээжин хотноо Хятад, Монголын Засгийн газар хоорондын комиссийн хуралдаан болно. Энэ үеэр Уул уурхайн яам 2013 онд Хятадад нийлүүлэх нүүрсний хэмжээг тохиролцох болно гэсэн мэдээлэл байгаа юм.