Их Британийн алдарт "Гуардиан" сэтгүүл энэ цаг үеийн дэлхийн шилдэг 100 хөлбөмбөгчийг тодруулсан байна. Уг шалгаруулалтад тамирчдын амжилт, ур чадвар, хувийн зан чанар гэх зүйлсийг харж тодруулсан юм. Мэдээж зуун шилдгийн дунд яах аргагүй гялалзах од нь Аргентиний шигшээ болон "Барселона" клубын довтлогч Лионель Месси байсан бөгөөд дуу нэгтэйгээр түүнийг тэргүүн дээдээр өргөмжиллөө. Харин удаахь байрт "Реал Мадрид", Португалийн шигшээ багийн супер од Криштиан Роналду жагссан бол гурав ба дөрөвдүгээр байрт Мессигийн хамтрагчид болох Шави, Инеьста нар орсон байна. Тавдугаар байрт Шведийн шигшээ болон  "ПСЖ"–ийн довтлогч Златан Ибрагимович орсон бол Фалкао, Робин ван Перси, Пирло, Яя Турэ, Эдисон Кавани нар эхний аравт багтжээ. Харин хаалгачдаас хамгийн өндөр оноо авч дээгүүр байрт бичигдсэн нь "Реал Мадрид" болон Испанийн шигшээ багийн хаалгач Икер Кассиллас байлаа. Түүнчлэн 20 дугаар байрт "Ювентус" клубийн хаалгач Жанлуижи Буффон орсон бол 29 дүгээр байрт Мануэль Нойер, 44 дүгээр байрт Петр Чех нар бичигджээ.

Эхний 100-д "Барселона" клубийн 11 тоглогч багтаж байгаа нь тус багийг Европдоо ямар өндөр рейтингтэй байдгийг харууллаа. Мөн шигшээ багуудаас гэвэл Испанийн 12 тоглогч эдгээр 100 шилдэгт багтсан нь мөн л нэгийг хэлж байна. Харин Английн Премьер лигт тоглодог 26 тоглогч эдгээр шилдгүүдэд багтаж байгаа нь тус улсын лигийн нэр хүндийг илэрхийлж байна.

Энэ оны шилдгүүдэд ганцхан Ази тоглогчийн нэр байгаа нь "Боруссия Дортмун"-дыг Бундеслигийн аварга болгоход үнэтэй хувь нэмрээ оруулж байсан Шинжи Кагава байлаа. "Манчестер"-ийн эгнээнд нэгдээд байгаа япон хөлбөмбөгч 94 дүгээрт бичигджээ.