Монголбанкнаас банкны салбарын оршин тогтнох үндэс болсон хадгаламжийн захыг тогтоожээ. Тодруулбал, 11 дүгээр сарын байдлаар нийт хадгаламж өмнөх сарынхаас 1.4 хувь буюу 65.3 тэрбум төгрөгөөр буурч, жилийн өмнөхөөс 20.5 хувь буюу 782.5 тэрбум төгрөгөөр өсч, 4 их наяд 597.0 тэрбум төгрөгт хүрсэн байна. Өөрөөр хэлбэл, банкинд итгэж, мөнгөө хадгалуулах нь жилийн өмнөхөөс багагүй хувиар нэмэгджээ. Энэхүү үзүүлэлтийг гаргахын тулд иргэдийн, аж ахуй нэгжүүдийн, валютын төгрөгийн хадгаламжийг судалсан байна.

Тухайлбал, иргэдийн төгрөгийн хадгаламж өмнөх сараас 1.2 хувь буюу 35 тэрбум төгрөг, жилийн өмнөхөөс 18.1 хувь буюу 444.9 тэрбум төгрөгөөр өсч 2905.6 тэрбум төгрөгт хүрчээ. Гадаад валютын хадгаламж өмнөх сараас 3.7 хувь буюу 55 тэрбум төгрөгөөр буурч, жилийн өмнөхөөс 42.5 хувь буюу 427.5 тэрбум төгрөгөөр өсч, 1432.4 тэрбум төгрөг болсон байна. Харин аж ахуйн нэгж, байгууллагуудын төгрөгийн хадгаламж өмнөх сараас 14.9 хувь буюу 45.3 тэрбум төгрөг, өнгөрсөн оны мөн үеэс 25.7 хувь буюу 89.8 тэрбум төгрөгөөр буурч 259.1 тэрбум төгрөг болсон ажээ. Ийнхүү нийт хадгаламжийн 68.8 хувь нь төгрөгийн, 31.2 хувь нь валютын хадгаламж эзэлж юм байна.