Монголын үндэсний олон нийтийн радио, телевизийн захирал М.Наранбаатар өчигдөр болсон “Болор үзэг”-т тун сонирхолтойгоор гангарчээ. Түүнийг усан цэргийн ахмадын малгай өмссөн байсныг анх хараад шинэ стиль, имиж бүрдүүлж байгаа юм болов уу гэтэл харин наадмын зохиомжийн нэг хэсэг нь байжээ. Монголын радио, телевизийн академи, Монголын мэдээллийн сайтуудын ассоциаци, Монголын сэтгүүлчдийн эвлэлийн шинэ жилийн баяраа “Мөрөөдлийн хөлөг онгоц”-оор аялахаар зохиомжилж, ахмадаар нь М.Наранбаатар томилогдсон юм байна. Тиймээс тэрээр ахмадын хувцсаар гангарч.

Сэтгүүлчид энэ үдэш “мөрөөдлийн хөлөг онгоц”-оор аялж Парист дуучин Нарангийн ая эгшгийг сонсч, Маяами арал дээр дуучин Т.Ариунаатай бүжиглэж, Антарктидад “Sweetymotion”-ийн гурван цасан охинтой бүжиж, “Чингис хаан”-ы Жаргалсайхантай дуулж, “Хурд” хамтлагийнхантай хуучин оноо үдэж, эрх чөлөөний Ибизад DZ man-тэй цэнгэн хөгжилдөж, халуун цэг Иракт “Бөртэ чоно үрс”-тэй бүжиглэв. Ийн сонин, сэтгүүл, радио, телевиз, мэдээллийн сайтынхан нэгэн үдэш цугларч шилдгүүдээ шалгаруулан “Мөрөөдлийн хөлөг онгоц” дээр “Болор үзэг”-эн хур буулаа. Энэ үдшийн хамгийн дээд шагнал “Киа” маркийн автомашиныг МҮОНРТ-ийнхэн “Эгэл амьдралын мөр” нэвтрүүлгээрээ хүртсэн юм. Басхүү энэ үдшийн хамгийн сонирхолтой өвлийн өвгөн нь зохиолч, сэтгүүлч Б.Галаарид байлаа. Монголын сэтгүүлчдийн эвлэлийн тэргүүн тэрээр эгээ л Монголын албан ёсны өвлийн Гомбосүрэн агсан, халааг авсан Хасар Жагаа нар шиг буурал сахал, цагаан нөмрөг намируулж, баярын мэндчилгээг шүлэглэж байлаа. Бас болоогүй ээ “Sweetymotion”-ийн гурван бүсгүйг цасан охиноо болгочихсон. Өвлийн өвгөн-Монголын сэтгүүлчдийн эвлэлийн тэргүүн ирж буй 2013 онд сэтгүүлчиддээ олон олон бэлэг барих болтугай.