“Thor” киноны од жүжигчин Крис Хемсворт бяцхан охиныхоо анхны Зул сарын баярыг Америкт тэмдэглэн өнгөрүүлэхээр өчигдөр эхнэр охиныхоо хамт Лос-Анжелесийн нисэх онгоцны буудалд газарджээ. Жүжигчин Крис Хемсворт эхнэр Эльза Патакитайгаа Зул сарын баярыг Английн Лондон хотод тэмдэглэн өнгөрүүлэх тухай өмнө мэдэгдэж байсан ч бодлоо өөрчлөн Лос-Анжелест ирсэн аж. Крис Хемсворт аяллын ачаагаа түрэхийн хажуугаар бяцхан охиноо анхаарал халамж тавьж, шүтэн бишрэгчиддээ гарын үсэг өгөх гээд их л завгүй явсан бол түүний эхнэр Эльза Патаки нь охиноо энгэртээ тэврэн явсан байна. Харин тэдний долоон сартай өхөөрдөм охин Индия Роуз нь ягаан өнгийн малгайтай цамц, гутлаар гангарч, онгоцны буудал дээрх бужигнасан олны хөл хөдөлгөөнийг харан гайхсан байдалтай нүдээ бүлтийлгэн элдвийг ширтэн яваа нь папараццид өртжээ. Австралийн жүжигчин Крис Хемсворт, Испанийн жүжигчин Эльза Патаки нар өнгөрсөн 2010 онд гэрлэсэн бөгөөд охин Индия Роуз нь өнгөрөгч тавдугаар сард Лондон хотод төрсөн билээ.