Америкийн нисэх онгоц үйлдвэрлэгч “Boeing” компанийн онгоц хүмүүсийн оронд шуудайтай төмс ачин, нислэг үйлдэх болжээ. Энэхүү сонирхолтой үйлдэл нь онгоцон доторх “wi-fi” интернэтийн сүлжээний чанарыг шалгаж, хэрхэн сайжруулах талаарх туршилтын ажилд зориулагдсан гэнэ. “Boeing” компанийн инженерүүдийн мэдээлснээр төмс нь хүнтэй адил цахилгаан долгионд нөлөөлөх чадвартай байдаг учраас онгоцны нислэгийн үед зорчигч “wi-fi”-н сүлжээнд хэрхэн нөлөөлж байгааг туршихад төмсийг ашиглаж байгаа гэнэ. “Boeing” компанийн инженерүүд нислэгийн үед төмс ашиглан зорчигчдын суудлын аль эгнээнд “wi-fi”-н дохио сайн эсвэл сул байгааг шалгаж байгаа аж.  Энэхүү сонин туршилтдаа тус компани онгоцны зорчигчдын суудлыг дүүргэхэд 9000 кг төмс ашиглажээ.