Өвлийн тэсгим хүйтэн үргэлжилж буй энэ өдрүүдэд эрчим хүчний ачаалал оргилдоо хүрдэг. Тиймээс Эрчим хүчний яамнаас цахилгааны хэрэглээ, ачааллыг графикаар мэдээлэх вэб сайтыг хийсэн байна. Энэ нь цагийн байдлаар төвийн бүсийн нэгдсэн сүлжээнд хамрагдсан байршлуудын хоногийн ачаалал, үйлдвэрлэж буй эрчим хүчин чадал болон ашиглалтыг харуулах  юм.

Орой бүр цахилгаан тасардаг боллоо гэж нийслэлчүүд ихээр бухимддаг ч оргил ачааллын үед буюу 18.00-21.00 цагийн хооронд эрчим хүчээ зохистой хэрэглэвэл эрчим хүчний доголдол үүсэхгүй байх боломжтой гэж албаныхан сануулж буй. Тиймээс Эрчим хүчний яамнаас ”Эрчим хүчний системийн оргил ачаалал болох 18.00-21.00 цагийн хооронд эрчим хүчийг зохистой хэрэглэнэ үү” гэсэн уриалгыг гаргаж байгаа ажээ.