Шударга өрсөлдөөн хэрэглэгчийн төлөө газар (ШӨХТГ)-аас цахилгаан, дулааны үнэ нэмэх тухай Эрчим хүчний зохицуулах хорооны саналыг судалж үзээд, үнэ нэмэхгүйгээр зардал бууруулах арга зам хайх үүрэг өгчээ.

“Хэрэглэгчдэд хүрэх үнийг нэмэх нь эцсийн арга биш. Өндөр үнэтэй тендер зарладаг явдлаа эргэж харах зэргээр үнэ нэмэх бус, зардлаа бууруулах өөр арга зам эрэлхийлэх шаардлага тавьсан” гэж ШӨХТГ-ын дарга О.Магнай мэдэгдлээ. Дээрх шаардлагыг ШӨХТГ-аас өнөөдөр Эрчим хүчний зохицуулах хороонд хүргүүлсэн байна. Шаардлагын дагуу Эрчим хүчний зохицуулах хорооноос үнэ нэмэхээс өөр боломжуудыг судалж үзээд буцаад ШӨХТГ-т мэдэгдэх ёстой аж. Үүний дараа тус газраас үнэ нэмэх нь зохистой эсэхийг шийдвэрлэх юм байна.