3,428.91
Шүүхээс 2,6 жилийн хорих ял сонссон МАХН-ын дарга Н.Энхбаярыг 10-аад минутын өмнө Зайсан дахь хорих анги буюу ШШГЕГ-ын харьяа хорих 401 дүгээр анги руу ачлаа. Биеийн байдлын улмаас сүүлийн гурван сарын хугацаанд Клиникийн нэгдсэн II эмнэлэгт хэвтэн эмчлүүлж байсан Н.Энхбаярт Шүүхийн шийдвэр гүйцэтгэх ерөнхий газраас ялын тогтоолыг нь гардуулаад, шууд хорих анги руу ачуулсан байна. Н.Энхбаярын хувьд ямар нэг эсэргүүцэл үзүүлээгүй бөгөөд шүүхийн шийдвэрийн тогтоолыг гардан авч, хорих анги руу авч явах машинд суужээ.Яг одоо Хорих 401 дүгээр ангийн үүдэнд Н.Энхбаярын гэргий О.Цолмон, МАХН-ын гишүүд болох Л.Цог, З.Баянсэлэнгэ, Хууль зүйн дэд сайд Э.Эрдэнэжамъян, Н.Энхбаярын өмгөөлөгч Б.Оюунбилэг нар ирээд байна. Н.Энхбаярыг хорих анги руу шилжүүлж буй талаар өмгөөлөгч Б.Оюунбилэгээс тодруулахад “Улсын дээд шүүхээс Н.Энхбаярт ялын тогтоол уншиж, танилцуулаагүй. Хуулийн дагуу ялын тогтоолыг эхлээд өмгөөлөгчид нь танилцуулах ёстой. Ялын тогтоолыг ШШГЕГ-ын харьяа 461 дүгээр хорих ангийн дарга н.Амардорж ирж, гардуулсан. Хуулийнхаа хүрээнд н.Амардорж бус, Улсын дээд шүүхэд гардуулж, танилцуулах учиртай” гэлээ.
НЭМЭЛТ 13:06 цагт:
Н.Энхбаяр өлсгөлөн зарлана гэв
ШШГЕГ-ын харьяа хорих 401 дүгээр ангид ял эдлэхээр болсон Н.Энхбаяр өлсгөлөн зарлах тухай түүний эхнэр О.Цолмон хэллээ. Тэрбээр “Миний нөхрийг энд санаатайгаар авчирсан. Хорлогдож магадгүй гэж үзэж байгаа учраас ямар ч эм тариа хийлгэхгүй, мөн хоол идэхгүй, өлсгөлөн зарлана” гэв.
Мөн хорих 401 дүгээр ангийн өмнө цуглаад буй МАХН-ын гишүүд, дэмжигчид Хорих анги руу нэвтэрнэ гэж дайрч байна. З.Баянсэлэнгийн хувьд УИХ-ын гишүүний бүрэн эрхтэй, тиймээс хорих анги руу нэвтэрнэ хэмээн зүтгэж, багагүй шуугиан дэгдээж байгаа талаар манай сурвалжлагч мэдээллээ.
