Өмнөд Солонгосын дуучин Пак Чэ Сан буюу Psy АНУ-ын Калифорни  мужийн Лос-Анжелес хотын Беверли-Хиллст  1.25 сая ам.доллараар 111 м.ктв талбай бүхий байр худалдан авчээ. 29 давхар бүхий “Blair House” хороолол дахь алдарт дуучны байр нь хоёр унтлагын өрөөтэй гэнэ. Тэрээр тансаг байрныхаа төлбөрийг шууд бэлнээр төлж, байрны гэрээг хийхээр ирэхдээ хажуудаа хоёр хамгаалагч дагуулан ирсэн тухай эх сурвалжууд мэдээлжээ.

Өдгөө 34 настай дуучин Psy өнгөрсөн зургадугаар сарын сүүлээр “Gangnam Style” дуугаа “YouTube” сайтад байршуулснаар дэлхий дахинаа алдарших үүдийг нээсэн юм. Түүний “Gangnam Style” дуу “YouTube” сайтад байршсанаас хойш хоёр сарын хугацаанд хоёр сая гаруй “Like” цуглуулан хүмүүсийн хамгийн дуртай дуу болсноор дэлхийн дээд амжилтыг бүртгэх “Гиннесийн ном”-д бичигджээ. Мөн “Gangnam Style” дуу гарснаас хойш дэлхийн томоохон чартуудыг хэдэн долоо хоногийн турш тэргүүлсэн амжилт үзүүлсэн юм. Харин дуучин Psy одоогийн байдлаар “Gangnam Style” дууныхаа борлуулалтаас 7.9 сая ам.долларын ашиг олоод байгаа аж.