Шинэ жилийн баярын уур амьсгал орж, хүн бүрийн сэтгэл гэгэлзэнхэн байгаа энэ үед хаа сайгүй л баярын тухай дуу эгшиглэж буй. Хамтлаг, дуучид ч энэ л баярт зориулан шинэ жилийн дуу, клипээ олны хүртээл болгодог уламжлалтай. Тэгвэл “Anemone” хамтлагийн охид энэ уламжлалыг эвджээ. Тэд энэ гайхалтай баяр дээр баяр нэмэхээр гэгээн хайрыг өгүүлэх цоо шинэ дууг шинэ клиптэйгээр хүргэх гэж байна.

Сонсогч, фенүүдээ багагүй хугацаанд хүлээлгэсэн тэд өнгөрсөн хугацаанд шинэ цомгийнхоо ажлыг дуусах шатандаа оржээ. Харин одоо танд хүрэх гэж буй “Хэлээгүй” нэртэй шинэ дуу нь тэдний удахгүй гарах “Anemone” анхны цомогт нь багтах гэнэ. Уг дууны хөгжмийг “UP MUSIC” продакшны хөгжмийн продюсер Н.Халиун, шүлгийг авьяаслаг залуу яруу найрагч П.Нарангэрэл бичжээ. Харин клипийг нь “V” студийн чадварлаг уран бүтээлчид хийсэн байна.

"Хэлээгүй" дууны хөгжмийн тохиргоог Сингапурт энэ чиглэлээр мэргэшсэн уран бүтээлчээр хийлгэсэн хэмээн тус хамтлагийнхан онцолсон юм. Мөн хамтлагийн охидын  шинэ клипний дүр төрх буюу нүүр будалт, үс засалт, стиль имижийг "Киви" хамтлагийн дуучин Ука тодорхойлсон гэнэ. Энэ мэтчилэн шинэлэг зүйл арвинтай  шинэ бүтээл тун удахгүй үзэгч, фенүүдэд нь хүрэх нь ээ.

Тэдний "Хэлээгүй" шинэ клипний teaser өнөөдрөөс цацагдаж эхэллээ. Харин энэхүү дуу нь энэ сарын 23-наас эхлэн бүх FM, радиогоор цацагдаж, дараа нь клип нь дэлгэцнээ гарч эхлэх юм байна.

“…Гэсэн ч би хайрлах сэтгэлээ
Хүслийнхээ гүнд нууж чадахгүй” энэ бол “Anemone” хамтлагийнхны өгүүлэх ээлжит шинэ хайрын түүх…