УИХ-ын сонгуулийн Өвөрхангай аймгийн Х тойрогт АН-аас нэр дэвшиж, түүгээр барахгүй нэг үе гишүүний тангараг өргөхөд бэлэн болоод байсан Д.Зоригт Элчин сайд болж магадгүй гэсэн сураг чих дэлсэв. Тэрээр долоо хоногийн өмнө гурван гишүүн тангараг өргөх үед Өвөрхангайн тойргийн маргаан шүүхээр шийдэгдтэл түр түдгэлзэх өргөдөл гаргаад байсан юм. Мөн өдөр УИХ-д суудалтай АН, МАН, ИЗНН-ын төлөөлөл Д.Зоригтыг байлцуулан уулзалт хийсэн.

Тэгвэл Д.Зоригтыг ОХУ-д суух Онц бөгөөд Бүрэн эрхт Элчин сайдаар томилуулах санал гараад байгаа сурагтай байна. ОХУ-д суугаа Элчин сайд Д.Идэвхтэний бүрэн эрхийн хугацаа өндөрлөх дөхөж байгаа тул түүний оронд Д.Зоригтыг илгээхээр АН, МАН тохирсон гэх чимээ дуулдаж эхэллээ. Хэрэв тийм бол МАН-аас нэр дэвшигч С.Чинзориг УИХ-ын гишүүний тангараг өргөх бололтой.