МАХН-ын дарга Н.Энхбаярыг өчигдөр тус намаас Орон нутгийн сонгуульд оролцож ялалт байгуулсан гишүүд, дэмжигчид нь Нэгдсэн хоёрдугаар эмнэлэгт эргэж очсон билээ. Тэд хоёр хоног намын байрандаа хуралдаж, Засгийн газраас гарахгүйгээр дотор нь байж гэмээнэ тэдний хийж буй тэмцэл үр дүнд хүрнэ гэж тооцоолжээ. Мөн ялын тогтоолоо хараахан гардаж аваагүй Н.Энхбаярыг ирэх жилийн Ерөнхийлөгчийн сонгуульд нэрийг нь дэвшүүлэхээр болов.

Манай сайт хэдхэн хоногийн өмнө “Н.Энхбаярыг хэн хэн эргэж очив?” хэмээх мэдээллийг шуурхай хүргэсэн билээ. Түүнийг эргэгсдийн дотор байсан хүмүүсээс МАН-ын дарга Ө.Энхтүвшин хоёр ч удаа МАХН-ын дэд дарга Д.Тэрбишдагвын хамт эргэж очсон явдал нь тус намын доторх хагарлыг улам даамжруулав. Ө.Энхтүвшингийн хувьд ямар учраас ойр ойрхон Н.Энхбаяртай уулзаж, ярилцах болов гэдэг нь хоёр намын нэгдлийн талаарх асуудлыг хөндөж ярилцсан гэх хардлагыг өөрийн эрхгүй төрүүлнэ. Гэвч энэ уулзалт ямар ч үр дүнд хүрээгүй нь МАХН Засгийн газраас гарахгүй гэж тус намын Ерөнхий нарийн бичгийн дарга Г.Шийлэгдамба өчигдөр мэдэгдсэнээр тодорхой болов.