Өнөө цагийн шилдэг хөлбөмбөгч гэгдэх Лионель Месси “Барселона” багтай гэрээгээ сунгажээ. Ингэснээр 2018 он хүртэл Испанийн багт хүчин зүтгэхээр болж байна. Өдгөө 25 настай Мессигийн өмнөх гэрээ 2016 оны зун дуусах байсныг ийнхүү хугацаанаас нь өмнө дахин хоёр жилээр сунгажээ.

Мессигийн хувьд энэ жил дуулиан шуугиантай өнгөрч байна. Он гарсаар клубынхээ төлөө, мөн шигшээ багийнхаа бүрэлдэхүүнд нийт 90 гоол оруулснаар хуанлийн нэг жилийн хугацаанд 85 гоол оруулсан домогт Герд Мюллерийн түүхэн амжилтыг эвдсэн билээ.

Испанийн лигийн 21 удаагийн аварга “Барселона” мөн хагас хамгаалагч Шави болон хамгаалагч Карлес Пуойль нартай гэрээгээ шинэчлэн байгуулсан байна. Шавигийн гэрээг 2014 оноос хойш хоёр жилээр, харин Пуойлийн гэрээ ирэх жил дуусгавар болох байсныг 2016 он хүртэл сунгажээ. Дээрх тоглогчдын хэн нь ч албан ёсоор гэрээгээ үзэглээгүй байгаа, гэхдээ гэрээний нөхцөлийг талууд хүлээн зөвшөөрсөн, тиймээс гэрээг тун удахгүй баталгаажуулна гэдгийг “Барселона” клуб албан ёсны вэбсайтдаа мэдээлсэн байна.