АНУ-ын Ерөнхийлөгч Барак Обама өнгөрсөн долоо хоногт Коннектикут мужийн Ньютаун хотод гарсан аймшигт аллагатай холбогдуулан  зэвсгийн тухай  хуулийг эргэн харж хорио цээрийг нэмэгдүүлэх хэрэгтэй гэдгээ албан ёсоор мэдэгдсэн хэмээн түүний хэвлэлийн төлөөлөгч Жей Карни мэдэгдсэн байна. Түүний мэдэгдсэнээр Ерөнхийлөгч Обама зэвсгийн хориог нэмэгдүлэх хүсэлтэй шинэ журмын урьдчилсан төлөвлөгөөг эхний байдлаар дараагийн Конгрессийн хуралд танилцуулах гэнэ.

Түүнчлэн өнгөрөгч баасан гаригт Ньютауны Сэнди Хук бага сургуульд  гарсан шиг гэмт хэрэгтэй цаг алдалгүй тэмцэх хэрэгтэй гэсэн Ерөнхийлөгчийн  хүчтэй байр суурь  зэвсгийн хориог чангатгах уг төлөвлөгөөнөөс харагдана хэмээн эх сурвалжууд мэдээлж байгаа юм. 

“Ньютауны халдлага мэт зэвсгийн хэргээс болж Америкт олон аав ээж, гэр бүлүүд зүрх сэтгэлээ шархлуулж байгаа бөгөөд дээрх асуудалд анхаарлаа хандуулж шийдвэртэй алхам хийх хэрэгтэй гэдгийг бидэнд сануулж байна” гэж Барак Обама албан ёсоор мэдэгдээд байгаа юм. Энэ үеэр Сенатор Фейнштэйний мэдээлснээр Конгресс зэвсгийн хориог чангатгах Ерөнхийлөгчийн төлөвлөгөөг ирэх оны нэгдүгээр сард болох  Конгресийн хурлаар  авч хэлэлцэх аж.