Монголын үндэсний сагсан бөмбөгийн холбооноос Үндэсний супер лигийн тэмцээнийг он гаргаад зохион байгуулах гэж байна. Нийт 80 сая төгрөгийн шагналын сан бүхий тус тэмцээний түрүү баг 40 сая төгрөгийн эзэн болох юм. Үндэсний супер лигийн тэмцээн нэгдүгээр сарын 28-нд Спортын төв ордонд эхлэх бөгөөд одоогоор зургаан баг тус тэмцээнд оролцохоор мэдүүлгээ ирүүлжээ. Тодруулбал, “Баянзүрх Буллз”, “Харцага”, “Танан гарьд”, “Эрдэнэдрийлинг RIGS”, “TLG-13” болон “QGX Акулууд” багууд Үндэсний супер лигт оролцохоо мэдэгдсэн байна.

Дашрамд дуулгахад, Монголын үндэсний сагсан бөмбөгийн холбооноос өнгөрсөн долоо хоногт Сагсан бөмбөгчдийн шинэ жилийг зохион байгуулжээ. Монголын сагсан бөмбөгийн спортын үе үеийн төлөөлөгчдөөс бүрдсэн 280 хүн оролцсон тус арга хэмжээний үеэр сагсан бөмбөгийн өнөө цагийн гарааны шилдэг таван тоглогчийг шалгаруулсан байна. Дасгалжуулагчид болоод спортын сэтгүүлчдийн саналаар тодруулсан гарааны шилдэг тавт О.Сэргэлэн /Cass SBL/, Ц.Азбаяр /Танан гарьд/, Н.Золжаргал /Эрдэнэдрийлинг RIGS/, Б.Билгүүн /ОТИС/, Б.Одбаяр /Харцага/ нар багтжээ.