Испаний ла лигийн 16-р тойрогт явагдсан хамгийн сонирхолтой тоглолт
хүснэгтийг тэргүүлэгчид болох Барсэлона болон Атлетико Мадрид нарын Камп
Ноу цэнгэлдэхэд явагдсан тоглолт байлаа. Атлетико хожвол тэдний ард
ердөө 3 онооны зөрүүтэй бичигдэх байсан тул тэдний хувьд тун чухал
тоглолт байсан юм.

Өнгөрсөн тойрогт нэг тоглолтонд 5 гоол хийсэн Р.Фалкао 31 дэхь минутад
тоглолтын салхийг нээсэн. Тус шөнө Атлетико Мадридын хаалгаа оносон ганц
цохилт нь ийнхүү гоол болжээ. Харин эхний үе дуусахаас өмнө буюу 36
дахь минутад Адриано, 45 дахь минутад Бускетс нар гоолдож багтаа
давамгайллыг авчирсан. Дараагийн хагаст Лионел Мэсси дубль хийж тоглолт
4:1-н харьцаатай өндөрлөлөө. Тэрээр энэ календарын жилд нийт 90 гоолыг
оруулаад байгаа нь энэ бөгөөд одоо түүнд ердөө ганц л тоглолт үлдээд
байна. Барсэлонагын хувьд хүснэгтийг 46 оноотой ганцаараа итгэл төгс
тэргүүлж яваа бол Атлетико Мадрид тэдний араас 9 онооны дутуу бичигдэж
эхэллээ.

Харин өнгөрсөн жилийн аварга Реал Мадрид клуб энэ тойрогт өөрсдийн
Сантъяго Бернабэу цэнгэлдэхдээ Эспаньол клубыг хүлээн авч тоглон 2:2-н
харьцаатай эвийн гэрээ байгуулжээ. 31 дэхь минутад С.Гарсия гоолдон
Эспаньол тэргүүлж эхэлсэн ч К.Роналдо эхний хагас дуусахтай зэрэгцэн
гоолдож, улмаар 48 дахь минутад бэртлээс эргэн ирсэн Ф.Коэнтрао тооны
харьцааг 2:1 болгов. Харамсалтай нь тоглолтын 88 дахь минутад Альбин
тэнцээний буюу эцсийн бөмбөгийг оруулж тоглолт өндөрлөжээ. Мадридчууд
65%-тай бөмбөг эзэмшин 22 цохилт гүйцэтгэсний 11 нь байгаа оносон бол
Эспаньолын хаалгаа оносон 4 цохилтны 2 нь ийнхүү гоол болжээ.

Тэд ийнхүү 16 тойргийн дараачаар хүснэгтийг тэргүүлэгч Барсагаас 13 оноо
дутуу мөн Атлетико Мадридын ард 4 онооны зөрүүтэй бичигдэж байна.