Он солигдох торгон мөчид салбар бүр оны шилдэг, онцлох хүмүүсээ тодруулан шагнаж, нийтэд танилцуулдаг. Улсын хэмжээнд зохион байгуулагддаг, хамрах цар хүрээ, ёслол төгөлдөр өндөр хэмжээний зохион байгуулалт, нэр хүндээрээ шилдэгт тооцогдох “Алтан сарнай” наадамд оролцохыг, Алтан сарнайн эздээр хэн тодрохыг Монголын ард түмэн тэсэн ядан хүлээдэг билээ. Нийгмийн Ардчилал Монголын Залуучуудын Холбоо /хуучнаар МАСЗХ/ 2000 онд анх “Алтан сарнай” наадмыг зохион байгуулж байсан бөгөөд жил бүр нэр хүнд, үнэ цэнэ нь улам өссөөр 12 дахь удаагаа зохион байгуулагдах гэж байна.

Монгол хүний үнэ цэнийг өргөж, шинэ цагийн Монгол улсын шилдэг төлөөлөл болж, өөрийн ажиллаж буй салбартаа тэргүүлэх гавьяа байгуулсан Оны онцлох хүнийг ОЛОН НИЙТИЙН НЭЭЛТТЭЙ САНАЛ АСУУЛГААР шалгаруулан урамшуулах нь “Алтан сарнай-2012” наадмын гол зорилго юм.

“Алтан сарнай-2012” оны тэргүүн наадмын онцлог нь оны онцлох хүн номинациудын эздээ 3 үе шаттай олон нийтийн нээлттэй санал асуулгад үндэслэн тодруулахаар www.altansarnai.mn сайтыг нээн, 2012 оны 12 дугаар сарын 7-30-ны өдрийг хүртэл санал асуулга явагдана.

Нийгмийн Ардчилал Монголын Залуучуудын Холбооноос зохион байгуулж буй “Алтан сарнай-2012” наадам нь “Шинэ жил Шинэ өнгө” уриатайгаар Соёл урлагийн салбарын оны онцлох хүн, Спортын салбарын оны онцлох хүн, Шинжлэх ухаан, техникийн салбарын оны онцлох хүн, Хүмүүнлэгийн салбарын оны онцлох хүн, Бизнесийн салбарын оны онцлох хүн, Нийгэм, улс төрийн салбарын оны онцлох хүн, Дэлхийн Монгол хүн – дэлхийн хэмжээнд Монгол улсын нэрийг дуурсгасан оны онцлох хүн номинациудад олон нийтийн дунд нээлттэй санал асуулга явуулж тодруулан юм. Монголын ард түмэн та бүхэн www.altansarnai.mn сайтаар зочлон өөрийн саналыг өгөхийг уриалж байна.